صرخـــات

موضوع: صرخـــات الثلاثاء 15 ديسمبر 2009, 1:54 am

صرخـــات

باحلم وأحلامي
واخداني
أسير ومكلبشاني
ضعيف يا سجّاني
وأسير على أرضي
ولا عارفلي وطن
أنا الغريب وأوطاني
محاوطاني
حوطة بحور الغراقى
غرقتوا يا عشاقى
فرفر مني السكوت
باصرخ كما كتكوت
من قبل لما يموت
من قبل ما التعابين
ما تخرج م الشقوق
وتسكن البيوت
من بعد ما إتسرق
وإتنهب
من بعد حتى
ما نتفوا عنه الزغب
إنجلد وإنضرب
ورموه كما المحروم
باصرخ أنا المظلوم
أنا المكلوم
بحرقة الإحساس
حرّموا عليا الناس
يا أم يا طِيبة
يا أب يا حاني
غرقان ف أحزاني
والغَرقة وخداني
جوه بحور نفسي
لحزن جوّاني
ناهشني كما الغول
وأصرخ كما المقتول
لأ مش أنا الجاني
دا دمي مش حبري
وعربي مش عبري
وعروبتي رامياني
وحداني
أنا الغريب وأوطاني
محاوطاني
وأصرخ كما مارد
مدبوح بسيف بارد
غدروا بيه ملاعين
ساقوه كما الشارد
ورموه ف صحاري
تايه ولا داري
باصرخ على داري
بدمي بانيها
شارب قنانيها
شلت العيال فيها
سلخوني من جلدي
وأصرخ على ولدي
إحزن كده معايا
و هِم ويايا
نرجّعها من تاني
آخدها ف أحضاني
سايباك ... وسايباني
وحداني
أنا الغريب وأوطاني
محاوطاني
وأصرخ كطفل برئ
تايه وسط الطريق
والنظرة ملتاعة
والصرخة وجّاعة
فينكم يا أحبابي
دي أرضي وترابي
ومايّتي وطيني
باصرخ فلسطيني
إصرخوا معايا
قدسي وأقصايا
تحزالصرخة جوايا
مالها كده نهاية
وتسيبني وأعاني
وحداني
أنا الغريب وأوطاني
محاوطاني
باصرخ بصوت عالي
تعالوا يا عيالي
وأقفوا هنا قبالي
لجل ما شوف دنياكم
وتحلالي
وتعالى يا كبيرهم
وإصرخ كده بدالي
وقوللهم فينكم
يا عمامي وخلاني
شيلوا عني أحزاني
ف الغربة أنا دايب
وهمومي دي زكايب
شيلوا ولو كلمة
شدوني م الضلمة
ورجّعولي النور
دانا ف بير مسحور
والسحر فيه آسن
ريح العفن طالع
محتاج أياديكم
ما بين حسنة وحاسن
تخرج مني المواجع
تفلت من إيدي الصوابع
وأقع تاني ف العطن
وبرضه ألقاني
وحداني
ولا عارفلي وطن
أنا الغريب وأوطاني
محاوطاني ...
باصرخ ... وناسياني ...
**********************